台灣家己ê故事，有時是因為欠包裝，所以咱家己毋知；另外一個最主要ê原因，應該mā是因為台灣人鄙相家己ê物件，這是咱ê教育造成ê：干焦看重中國，掠做彼是全世界。讀台灣史，我知影南澳tī清國時代pat有一個英國人tī hiâ建立王國，雖然擋無外久。我mā知影清國開ê北路，chiah tú-á通無外久，tō kah無通是仝款ê。 對peh過山ê朋友來講，作者寫ê代誌：山內chhē路、kah原住民互動、...應該加減lóng有感覺。作者對Sayion ê故事有趣味，透過踏查來實現心內ê夢，故事本身是美麗、hō͘人有期待ê，因為台灣有原住民，hō͘咱peh山有koh-khah choē精彩ê故事。10幾冬前去peh南湖大山tú著ê魔神仔古，mā一直khǹg tī心內，想beh kā發展做一個故事。 我toà花蓮，若是駛車行蘇花，去到南澳，因為iah-koh有半點外鐘ê車路路程，所以極加是tī南澳車頭停睏、放尿，了後繼續趕路。讀完這本書，hō͘我對南澳koh-khah深 ê想像。故事尾後，講著Sayion其實無死，m̄-koh必須愛bih起來過日子，koh增加這個故事本身ê神祕感，到底是成實[chiâⁿ-si̍t]抑是假影，相對已經無hiah-nī要緊a，要緊ê是，這個故事對你家己本身ê意義。 文筆koh有改進ê空間，這是個人感覺。